تقرير عن سيارة هيونداي IX35 من أحد ملاكها

تقرير عن سيارة هيونداي  IX35 من أحد ملاكها

نقدم لكم اليوم تقرير جديد عن سيارة هيونداي IX35 يقدمه لكم أحد أعضاء منتدى نايل موتورز يسرد فيه خبرته وتجربته مع السيارة منذ استلامها ويركز الضوء على مميزات سيارة هيونداي ix35 وعيوبها، وإليكم مشاركته كما كتبها:

السادة الاعضاء الكرام المحترمين ، كل عام وحضراتكم بخير وبألف صحة وسلامة ويارب الخير والاستقرار لمصر والمصريين فى كل مكان فى المحروسة.
دا تقرير حصرى ومبدئى للسيارة الهيونداى IX35 Fully Loaded High Line عن مسافة 700 كم وهو لا يعد التقرير الاول لسيارة هيونداي ix35 فهناك عضوين من رواد المنتدى المحترمين كتبوا تقرير ولكن عن الفئة الثانية فقط ودا رابط المواصفات والكماليات للثلاث فئات على موقع هيونداى مصر (Hyundai Egypt) تحت إسم Features.
أنا مش هاعيد نفس البيانات الى ذكرها السادة الاعضاء ملاك السيارة ولكن هاحاول التركيزعلى الفروق بين الفئة الثانية والفئة الثالثة (Fully Loaded High Line) مع سرد ملاحظاتى المتواضعه نظرا لعدم تخصصى فى النواحى الفنية:

أولا : الفروق فى الكماليات والامكانيات بين الفئة الثانية والثالثة لسيارة هيونداي ix35:

1-    فتحة السقف + سقف بانوراما
السقف منقسم لقطعتين ، الجزء الامامى هو فتحة السقف الكهربائية قابلة للأمالة ويتم فتحها بواسطة مفتاح 3 حركات (يتم الضغط فى ثلاثة أتجاهات) ويمكن للسائق التحكم فى المسافة المفتوحة حسب زمن الضغط على المفتاح، وفتحة السقف تمثل نسبة 50% من السقف تقريبا يعنى المساحة مش فتحة إعتيادية
بالنسبة للجزء الخلفى من السقف فهو بانوراما لركاب الكنبة الخلفية ولون السقف عموما أسود لكل الالوان المتاحة من السيارة
ولو فرض نسيت السقف مفتوح وقفلت العربية هاتسمع صوت تحذيرى والسنتر لوك مش هايقفل
2-    كاميرا خلفية
يوجد كاميرا خلفية لتسهيل عملية ركن السيارة وهى فى رأيى عملية جدا خصوصا فى حالة الارصفة ووجود سيارات الخلف ويتم تنشيطها اليا فى حالة الرجوع للخلف فى وضع R وتظهر فى الجانب الايسر من مرآة الصالون مع درجة وضوح عالية الجودة وحدود للمسافة بألوان مختلفة وتعمل الكاميرا مع حساس الركن وبصراحة فعالة جدا مع عربية بالحجم والعلو دا
3-    مفتاح زكى (Smart Key)
بمجرد وجودك بمسافة متر واحد حول لسيارة يمكنك فتح الشنطة مباشرة بدون فتح السنتر أو يمكنك فتح السنتر لوك بضغطة على الزر الاسود فى الباب الامامى ، وفى حالة وجود مفتاح الاضاءة على وضع Auto فعند الضغط على زر غلق السيارة سيتم تفعيل المصابيح الكبرى لمدة نصف دقيقة تقريبا وأعتقد دا لمساعدتك فى رؤية أوضح فى حالة دخول منزلك والخاصية دى موجودة فى بعض السيارات تحت إسم Follow me home وبردة فى حالة فتح السيارة بالريموت سيتم تفعيل نفس الخاصية، والمفتاح أنا بشيلو فى جيبى علطول عشان مانساهوش جوا العربية وللعلم لو نسيتوا جوا العربية بعد ما بتقفل الموتور بيطلع صوت تحذيرى والسنتر لوك مش هايقفل
4-    Start & Stop Engine
يتم الضغط على الفرامل وضغط مفتاح Start بلمسة واحدة والعربية هاتشتغل فورا وتكاد لا تسمع صوت الموتور أما فى حالة ضغط المفتاح بدون الضغط على الفرامل فكأنك بتفتح أول حركة فى المفتاح العادى ودا اللى بيفتح النور والكاسيت والازاز
5-    برنامج الاتزان عند المنحدرات DBC
يمكن إستخدامه فقط تحت سرعة 40 كمساعة ودا شىء منطقى لانك لو نازل بسرعة أكبر فدا فى خطورة وطبعا ينصح باستخدام الخاصية دى فى المناطق الغير ممهدة واللى لاحظتة إن الفرامل بتشتغل بزيادة شوية وبحس زى مايكون الفرامل بتشتغل على كل عجلة لوحدها حسب طبيعة الانحدار وبيتلغى لو زادت السرعة عن 40كم أو لو سيادتك ضغطت على الزر الخاص به
6-    برنامج الاتزان عند المرتفعات HAC
الخاصية دى بقى ليها معايا موال طويل شوية مع غبور ، أنا من طبعى بحب أقرأ أى كتالوج أو مانوال الجهاز أو العربية اللى بشتريها عشان أعرف كل كبيرة وصغيرة ودا الخاصية الوحيدة اللى مش لاقيها فى المانوال بتاع العربية ومالهاش زرار فى التابلوه زى بقية برامج الاتزان ، طب إيه بقى ، مكدبتش خبر وكتبت كومنت على صفحة الفيس بتاعة هيونداى ايجيبت والناس بصراحة طلعو محترمين وكلمونى على طول ولكن الرد ماكنش وافى ، المهم كلمونى تانى وقالولى إن فيه فيديو على اليوتيوب بيشرح الخاصية دى ولكن على العربية Tucson ودخلت وشوفت الشرح والسؤال هنا بقى طب ليه مش موجود فى مانوال العربية IX35؟؟؟؟؟؟ وبعدين صعب إنك تحس بيها فى العربية والخاصية بإختصار إنك لو فى مطلع ودوست على الفرامل وبعدين شلت رجلك من على دواسة الفرامل العربية مابتتحركش للخلف لمدة ثانيتين ( طب لو أنا سايق عربية أتوماتيك ومعشق D وطالع مطلع وشلت رجلى من على دواسة الفرامل العربية هاترجع لورا؟؟؟؟ ماظنش ، والخلاصة إنى مش مقتنع بصراحة لغاية دلوقتى ولما سألتهم فين الكلام دا فى المانوال ملقيتش إجابة للاسف
7-    برنامج الاتزان الالكترونىESP
ودا بيشتغل أتوماتيك ولكن يمكنك إيقافه وبصراحة ثبات العربية كمان ممتاز باعتبار إنك سايق عربية SUV أقصى سرعة جبتها بالعربية 120كم نظرا لحالة التليين ولكن أنا مشيت بالعربية فى ملفات ضيقة بسرعات 100 و120 ومع الاخذ فى الاعتبار علو العربية وكانت النتيجة ممتازة، والتجربة العملية على كدا إنى بمشى بيها فى منزل المقطم القديم (شديد الانحدار وبه ملفات خطيرة) وعلى سرعات 80 كم و70كم ومقارنة بسيارتى الرينو السيدان ومع قدرتى على المناورة بيعا فى المنزل دا فدا شىء جيد جدا
8-    فرش الجلد البنى
دا بقى كان مفاجئة عند الاستلام لان غبور قالولى الفرش هايبقى إسود وأنا كان نفسى فى الفرش البنى عشان بصراحى شكله روش والخامة كمان ممتازة

ملاحظاتى على سيارة هيونداي IX35

ملاحظات إيجابية

1-    تسارع العربية جيد خصوصا إنى كنت قلقان جدا من حجمها مع الموتور 1600 سى سى والذيذ بقى خاصية الكيك داون ودى يكفى إنك تدى نغزتين لدواسة البنزين هاتلاقى العربية تحولت لحمادة تانى خالص (على رأى أحمد حلمى) وبصراحة من غيرها العربية بطة بلدى
2-    مجال الرؤية للسائق نهارا وليلا جيد جدا فى ظل وجود المرايا الجانبية والتى تطوى كهربائيا والخاصية دى بتنفع فى الاماكن الضيقة وأيضا مرأة الصالون ذاتية التعتيم
3-    وضعية السائق جيدة جدا فى ظل وجود كرسى متحرك فى 6 إتجاهات ومسند رأس مريح ونشط ودركسيون تليسكوبى
4-    الفرامل ممتاز وحساسة جدا وياريت اللى يركب معاك يربط الحزام حتى اللى ورا عشان لو حملت على الفرامل شوية اللى معاك هايلبسو يا معلم
5-    بور الدركسيون خفيف جدا وتحس إنك بتتعامل مع عربية بحجم أصغر من الحجم الطبيعى وطبعا فى الركنات ممتاز
6-    عفشة العربية جيده جدا ولكن مش ناعمة أوى مقارنة بسيارات أخرى زى الرينو مثلا مع العلم إنى حطيت نيتروجين أول ما جبتها
7-    حجم الصالون والشنطة جيد جدا ولكن لخمس أشخاص عشان فى ناس لما بتشوفها من بره متخيله إنها ممكن تاخد 7 أشخاص
8-    حوار Day light روش ولكن قابل بقى ياعم كل شوية تلاقى حد بيشاورلك على أساس إنك هاتحاسب وزارة الكهربا أخر الشهر
9-    يمكن طى الكنبة الخلفية ودى بتدى مساحة ممتازة لو عايز تنقل حاجة طويلة
10-    تكييف العربية Dual Zone رائع وباليل ومع السرعات العالية شرطة (درجة) واحدة فى المروحة ساعات بتبقى كافية وبالنهار لو مركونة فى شمس الصيف شغل التكييف أوتو هاتلاقى الـ 8 درجات ضبطو الجو خلال 3 دقائق
11-    صاج العربية محمل وجيد ، مرة وأنا طالع من نادى وادى دجلة لقيت شباب قاعدين على الكبوت ومربعين وواخدين راحتهم على الاخر وبصراحة كنت ناوى أجيبلهم كبايتين شاى بعد ما أضربهم على قفاهم من الغيظ بس الحمد لله مفيش حاجة فى الكبوت

ملاحظات سلبية :

1-    مفيش بلوتوث فى العربية وطبعا إضطررت لاستخدام الكاركت الجابرا بتاع العربية التانية وأهو كافى بصراحة بس يعنى مع كل الامكانيات دى مش قادرين يحطوا بلوتوث
2-    مفيش وحدات رفع ، كان هايبقى أفضل لو فيه وحدات رفع للزجاج وفتحة السقف والمرايات بلمسة واحدة ودى موجودة فى عربيات أرخص منها
3-    السنتر مش بيقفل أوتو بعد العربية ماتتحرك ولازم حضرتك تقفلة فى ظل ظروف الشارع وعدم وجود الامان وأكيد ممكن تنساه
4-    إضائة التابلوه عالية جدا ولكن فيه مفتاح بتتحكم بيه فى درجة الإضائة وأنا عن نفسى بخليه على أعلى من النصف بدرجة
5-    مفيش سنسور شوك للانذار وياريت يوفروه فى التوكيل زى ما عملو للالنترا
6-    كان نفسى ينزل مصر شاشة DVD مكان الكاسيت ودى بتنزل بره وعليها الرؤية الخلفية فى حالة الرجوع
7-    الكلكس حنيين حابتين وعامل زى الراجل المفتول العضلات وبيطلع صوت حريمى
8-    مساحات التخزين ممكن تبقى أكبر بشوية إستغلال للمساحات

كماليات ممكن أركبها :

–    خاصية التتبع على الـ GPS
–    إكصدام خلفى نيكل (حاجة كدا محندئة ومش مبهوء زى اللى فى الشيروكى)
–    عوارض سقف والموضوع دا عايز دراسة عشان فتحة السقف

وأخيرا أرجو إنى أكون أفدت حضراتكم وأرجو الدعاء لى بالخير وأتقبل أى نقد موضوعى للتقريروتحت أمركم فى أى إستفسار خصوصا إنى إستفدت كتير من المنتدى وفى قرارات شراء أخذتها سابقا من منطلق معلومات الزملاء رواد المنتدى المحترمين

أمحمد طنطاوى